El tilegin  eskerińiz, Elbasy!

Qazaqstan halqy As­sam­b­leıasynyń Keńesi bastap, búkil halyq qostap, Parlamenttiń qos palatasy, Úkimet qoldap,  Kons­tıtýsııalyq Keńes rastap, osy­dan eki kún buryn Memle­ket basshysynyń Qazaqstan hal­qyna Úndeý arnaýymen, «Qazaqstan Respýblıkasy Pre­zı­dentiniń kezekten tys saı­laýyn taǵaıyndaý týraly» Jarlyqqa qol qoıýymen tııa­naqtalǵan taǵdyrly, tarıhı sheshim barsha jurttyń kóńi­linen shyǵyp otyr. Ony «Ege­men Qazaqstannyń» áýelde oı­lastyrylǵan eki betine syımaı, tórt betin toltyryp ketken qýanyshty qoldaý sózderi jarııalanǵan keshegi nómiri de aıǵaqtaıdy. Árıne, halyq kezekten tys pre­zıdenttik saılaýdy ót­ki­zý jónindegi bastamany qol­da­ǵanda áıteýir bıyl saılaý­dy atqaryp alaıyq, kelesi jyl­ǵy parlamenttik saılaýmen qa­battaspasyn, Konstıtýsııanyń talaby buljytpaı saqtalsyn dep qana otyrǵan joq. Halyq bul bastamany qoldaǵanda eń al­dymen eldiń erteńin erte jaryqta aıqyndaıyq, el bas­qarýdyń  eki tizgin, bir shyl­byryn elin súıgen, eli súı­gen erge bereıik, álemdi býyp turǵan ekonomıkalyq qıyn­shylyqtardy Elbasy­myzdyń basshylyǵymen birge eńsereıik dep otyr. Sondaı tusta eldiń Prezıdent óz Úndeýinde aıtqan «Aldaǵy saılaýǵa ózimniń qaty­satynyma oraı sheshimdi men keıinirek, elimizdiń Kons­tı­týsııasy men zańdaryna tolyq sáıkes qabyldaıtyn bolamyn» degen ustamdy sózine úmit ar­tatyny da anyq. О́ıtkeni, biz Nursultan Nazarbaevtyń ege­mendiktiń eleń-alańynda, Táýel­sizdiktiń tańsári shaǵynda aıtqan «Men elimniń jolynda basymdy báıgege tikken adammyn» degen sózin umytpaımyz. О́ıtkeni, biz Nursultan Nazar­baev­tyń búkil ómirin, bar bilimi men biligin, bar qabileti men qajyryn halqyna, tek halqyna, taǵy da halqyna arnaıtynyna anyq senemiz. Al eldiń ondaı úmitin aldymen kimder bildire alady? Keńestik kezeńniń kórnek­ti jazýshysy, orys kórkemsóziniń zergeri Andreı Platonovtyń «Qart mehanık» degen áńgi­me­sinde bir keıipker: «Bez menıa narod ne polnyı!» deıtin edi. Qa­natty sózge aınalyp ketken bul tirkes ár adamnyń azamat jáne tulǵa retinde el ómirinde ózinshe alar orny bar ekenin kórsetedi. Sonyń ózinde de el sózin ustaǵan, el úshin qalam ushtaǵan azamattarymyzdyń – qalamgerler qaýymynyń memlekettiń tynys-tirshi­li­gindegi joly bólekshe. Bul dál osy kúnderde taǵy da tamasha tanylyp otyr. Keshe Almatyda, Qazaqstan Jazýshylar odaǵynda qalamgerler qaýymy bas qosyp, aldaǵy saılaýǵa túsýge El­basymyz Nursultan Ábishuly Nazarbaevtyń kelisim berýin suraǵan málimdeme jasady. Astanadaǵy beldi jazýshylar­dyń bir toby redaksııamyzǵa habarlasyp, osy máselege oraı óz pikirlerin taralymy eki júz myńnan asatyn el gazeti arqyly jetkizýdi surady. Qalamgerler qaýymynyń lebizder toptamasyn «Egemen Qazaqstannyń» búgingi nómirine (2-shi betke) jarııalaı otyryp, osynaý ortaq oı barsha jurtshylyqtyń kóńilinen shyǵatynyna, búkil halyqtyń qoldaýyna ıe bolatynyna nyq senimimizdi bildiremiz. Sonymen, eldiktiń taǵy bir syn saǵaty soqqaly tur. Eli­miz jasampazdyq jolyn jemisti jalǵastyra ber­sin desek, memleketimiz biz­diń ózimizge qatysy joq sebep­termen betpe-bet kelip otyr­ǵan qıyndyqtardy tabys­ty eńsersin desek, ishki jáne syrtqy saıasatymyzdaǵy sa­baq­tastyq sátti saqtalsyn desek, halqymyzdyń kóńil-kúıi aldaǵy kezde de alańsyz bolsyn desek, erteńgi kúnine senimdi bolsyn desek, biz Qazaqstandy osy jyldar ishinde bir asýdan bir asýǵa bastap kele jatqan, týǵan elin álem tanıtyn, sanasatyn, qurmetteıtin elge aı­naldyrǵan Azamatqa – Nur­sultan Nazarbaevqa halyq atynan usynys aıtýǵa, úmit artýǵa, eli úshin kesimdi sheshim qabyldaýyn suraýǵa tıispiz. Ol sheshim Elbasynyń ózinen de buryn ózi janyndaı súıetin, sýyǵyna tońyp, ystyǵyna kúıetin eli úshin kerek, ortaq Otanymyz – Qazaqstannyń bolashaǵy úshin kerek. Qysqasy, Elbasyna tile­gi­mizdi qazaqy qaıyrymǵa salyp túıindesek: Jelbiretýge el týyn, Shyǵyńyz taǵy bel býyp! Saýytbek ABDRAHMANOV.